حكاية مشرمل من فاس

فقتْ ليوم مــع 8 ديال الصبــاح ، الجو كان زوين والسمــا غايمة ، بقيتْ كانفكرْ بزافْ شنو غانديرْ فهــادْ الصبــاح ، قلتْ نخرجْ نقلبْ على الذهبْ لأن لفياق بكري بالذهب مشري يعني خاصني نشري الذهب يعني خاصني نشريهْ فحالي ، لبستْ شورطْ وهزّيتْ لفوطــة ومشيتْ لواحدْ الواد كنتْ كانلعبْ فيه ونــا صغير ، غيرْ وصلتْ حيدتْ الشورط والتلاحيتْ فيه ، الواد بــارد وعامر بالخرا بقيتْ فيه شي 20 دقيقة ، ماعرفتشْ فاش كنتْ كانفكرْ فداك اللحظـة ، ولكن ملي حسيتْ أني والليت غــانزْ خرجتْ ورجعتْ للدار ، سخّنتْ لمــا فالبوطة وميلونْجيتو مع لمـا بــاردْ وبقيتْ كانخويه عليـّــا حتى حسّيتْ باللي ريحتي واللاتْ زوينة ، مشيتْ لبستْ حوايجي وخويتْ عليـا الريحة كولهـا وخرجتْ عاوتــاني ، كــانتْ السـاعة شي لحداشْ مشيتْ عند البّـا عبد الله باشْ نفطــرْ كليتْ لخليعْ بالبيض وأتــاي ، حسيتْ براسي مزال فيـا الجوع زدتْ طبسيل ديال البقولـة ، خلّصتو فالنص وقلت ليه هـانتا كاتسال البـاقي ، البّا عبد الله حسْ بيا مقودة عليـا وهو يردْ ليـا فلوسي ، قالي ليوم فطورك على حسابي ، أنــا نْحلفْ وهو يحلفْ ولكن حيتْ هو كبر مني مابغيتشْ نحنتو ، مشيت للمحطة ديال الطاكسياتْ ، ركبتْ طاكسي كبير فيه 6 ديال النـاس والشيفور ، حسّيتْ براسي غانطرطق ولكن صبرتْ حيت على الأقل الطاكسي لكبير كانركب فيه غير بثلاثة ديال الدراهمْ ، كانتْ كالسة حدايـا واحد لبنتْ زوينة حتى هي مكانش عاجبهـا الحــالْ ، باينة فيهــا طالبة ، وباش تحارب الملل قالتلي زوينة ريحتْكْ ، حسيّيتْ بها بحـال إلى كاتحشيلي لهضرة وقلتْ مع راسي ياك ماشمّــاتْ فيّـا ريحتْ بوخراربْ ؟! شافتني ماجاوبتهاشْ وهي تْتكرّه وتقلبْ وجههـا لهيهْ ، مابغيتشْ نكون سبب فتعاسْتهــا ونـا نقولهــا حتى ريحتكْ زوينــة .. وصلنــا حْدا لافــاكْ وهي تنزلْ ، انــا كنت غادي ننزلْ حتى لحي الليدو ،ولكن فاش نزلاتْ وقـادّاتْ لوقفــة لقيتهــا كاتْحمّقْ ، الصدرْ واقفْ والشعر شلال ولاطــاي ديال فرسْ ، دارتْ صاكهـا فيدّيهـا ومشاتْ كي شي بطـّة ، تكْ تكْ تكْ .. الطاكسي زادْ شوية ونــا نقولو حْبسْ هنــا ، نْزلتْ ومشيتْ موراهــا وقبلْ مـانوصلْ ليهــا دوراتْ وجههـا شافتني وهي توقفْ ، وقفتْ حداهـا ، حسيتْ بيهـا كاتسنـاني نقول شي حــاجة ونـا مالقيت مانقول ، ماعرفتش أصلا علاش تبعتهــا ، بقينــا شي نص دقيقة وحنــا ساكتين ، ونـا نقولْ ليهــا بغيت نمشي معـاك باش يتعرضش ليك شي مشرمل ، وهي تضحك واحد الضحة زوينة ، وحتى أنــا ضحتْ ، قالتلي ماتخافش أنــا براسي مشرملة ، ولكن عادي تمشي معـايا حيت أنــا راني كانعرفك أصلا وديمـا كانشوفك فلافاك وديمـا كانقرا داكشي اللي كاتكتبْ فالفايسبوك .. قلتْ ليهــا انتي باش داخلا فالفايسبوك ، قالت لي أنــا من دوك الأشباح ، وضحكــاتْ ، وحتى أنــا ضحكتْ .. كانت الساعـة شي الوحدة تقريبــا ، مشينـا بجوج للبوفيط ، خديتْ قهوة وخديتْ ليهـا أتـاي ، مول القهوة صاحبي حتى هو مابغـاش يتخلص منـي ، أنـا نحلفْ وهو يحلفْ وفالأخير مابغيتش نحنتو حيتْ هو كبير عليـا ، شريتْ كـارو ، كلستْ حداهــا وشعلتو وبقينــا كانهضرو ، قلنــا كولشي تقريبـــا ، مابغيش نغني ليهـا الدّيسكْ ديال راك زوينة وعجبتني وأجي نديرو شي علاقـة عابرة ، ماعرفتش علاش ، ولكن النقـاش معاهـا كان زوينْ بزاف ، حيت تّـا هي كاتشبهلي ، مْقودة عليهـا وكاتقرا فلافاك ودايرة عطر زوين وكاتركب فطاكسي كبير يعني مشرملة آخــر حاجة وساكنة فحي شعبي معروف بالمجرمين وقطاع الطرق وبمجرد دخولها وخروجها منه دون أن يمسها أحد يدلّ على أنها فْشكلْ .. وصلاتْ السـاعة شي الجوج ونص وهي تقولي خاصهــا تمشي تقرا ، خديتْ نمرتهـا وخداتْ نمرتي وقالتي غانشوفك مرة اخرى ؟! قلتْ ليهــا أكيد غانشوفك مرة اخرى .. رجعتْ للقهوى ديالي ، طالقين فريد الأطرش ، والدراري كايتكيفو الجوانـاتْ ، ريحتْ لحشيش سْكراتني وصورة البنتْ بدات تبالي بين عيني ، خديتْ قهوة اخرى وبزاف ديال لكـارو بالكريدي ، وفتحتْ البيسي ، وقلتْ أول حــاجة غادي ندير ، هي غانكتب على هاد المشرملة ..